As aktorja Halle Berry nuk mundi t’i shpëtonte mallkimit “Oscar”. Berry ka zbuluar për “Entertainment Weekly” se ishte e habitshme që asaj nuk iu ofruan role filmash, pas fitores së saj historike në ndarjen e çmimeve Oscar, në vitin 2002, për rolin e saj në “Monster’s Ball”.
Kur korr një fitore historike si ajo, mendon: ‘Oh, kjo do ta ndryshojë çdo gjë rrënjësisht.’ Më ndryshoi rrënjësisht, por nuk e ndryshoi karrierën time brenda natës. Ende më duhej të kthehesha në punë. Ende më duhej të përpiqesha të luftoja për të gjetur një rrugëdalje kur s’kisha asnjë mundësi.
Berry bëri histori gati 20 vjet më parë kur u bë gruaja e parë me ngjyrë që fitoi çmimin e “Aktores Protagoniste Më të Mirë” në “Academy Awards”. Ndryshe nga ç’mund të mendohej, Berry u përball me një varg dështimesh pas fitores, duke përfshirë atë të filmit “Catwoman” të vitit 2004, që fitoi katër çmime Razzie, çmimet për filmat më të këqinj.
Sipas revistës “Organization Science”, “mallkimi i Oscar-it” është besimi që fatkeqësia bie në mënyrë paradoksale te fituesit e çmimeve të Akademisë. Kjo sepse shumë aktorë pasi kanë marrë çmime Oscar nuk kanë pasur karrierën e suksesshme siç mund të pritet pas fitores së një çmimi kaq të rëndësishëm.
Ndërkaq, Halle edhe pse është 54-vjeçe ka një fizik që shumë do ta kishin zili. Ajo shpesh poston në llogarinë e saj në “Instagram” foto ku tregon muskujt e barkut apo teksa është duke u ushtruar. Halle ka përfshirë sportin e boksit si të preferuarin e saj dhe merret prej shumë vitesh me të. Aktorja thotë se ushtrimi njëkohësisht i të gjithë muskujve të trupit, është çelësi i një fiziku të mirë pasi të tonifikon dhe djeg kaloritë.
