Pranga një të riu në Tiranë. Policia e kapi në flagrancë me armë zjarri pistoletë, municione dhe fara kanabisi, në kuadër të operacionit të koduar “Arbana”. Referuar informacioneve paraprake, uniformat blu dyshojnë se armën, 22-vjeçari e kishte për ta shitur. Policia po punon për identifikimin e të tjerë personave që mund të jenë të përfshirë.
Në zbatim të masave të përcaktuara në planin operacional mbarëkombëtar “Sundimi i ligjit”, u finalizua operacioni policor i koduar “Arbana”. Operacioni u zhvillua nga Seksioni për Trafiqet e Paligjshme, në bashkëpunim me atë të Forcës së Posaçme Shqiponja, në DVP Tiranë.
U kap në flagrancë, duke lëvizur i armatosur, vihet në pranga një 22-vjeçar. Sekuestrohen, në cilësinë e provës materiale, arma e zjarrit pistoletë me krëhër dhe municion luftarak, si dhe fara kanabisi, që iu gjetën 22-vjeçarit gjatë kontrollit të banesës.
Shërbimet e Seksionit për Trafiqet e Paligjshme në DVP Tiranë, në bashkëpunim me ato të Forcës së Posaçme Shqiponja, në vijim të punës për parandalimin dhe goditjen e veprimtarisë kriminale në fushën e armëmbajtjes pa leje, bazuar dhe në informacionet e siguruara në rrugë operative se në afërsi të rrethrrotullimit të Teg-ut, ndodhej një shtetas të armatosur, menjëherë kanë organizuar dhe finalizuar operacionin policor të koduar “Arbana”, për kapjen e tij.
Si rezultat i këtij operacioni u arrestua në flagrancë shtetasi R.M., 22 vjeç, banues në Arbanë. Gjatë kontrollit të shtetasit R. M., shërbimet e Policisë, i gjetën dhe sekuestruan, në cilësinë e provës materiale, një armë zjarri pistoletë me krëhër e municion luftarak.
Në vijim të veprimeve, gjatë kontrollit të banesës së tij, shërbimet e Policisë gjetën dhe sekuestruan sasi municioni luftarak si dhe fara të dyshuara kanabisi. Nga informacionet e marra dyshohet se ky shtetas armën e zjarrit e kishte për ta shitur. Punohet për identifikimin e personave të tjerë, të implikuar në këtë veprimtari kriminale. Në vijim të veprimeve u bë arrestimi në flagrancë i tij dhe materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
