Dioqeza e Rashkës dhe Prizrenit e Kishës Ortodokse Serbe në Kosovë konfirmoi se Manastiri i Deçanit ka regjistruar në emër të tij 24 hektarë tokë në Kadastrën qendrore të Kosovës, në Prishtinë. Në njoftimin që mban datën e sotme, konfirmohet zbatimi i vendimit të Gjykatës Kushtetuese të vitit 2016.
Në bazë të ekstraktit kadastral mund të konfirmojmë që është zbatuar vendimi i Gjykatës Kushtetuese i vitit 2016 dhe Manastiri edhe në kadastër njihet si pronar i tokës së kontestuar më herët. Me këtë ne mundemi konkludojmë se procesi i kahershëm ligjor që është zhvilluar rreth 24 hektarëve tokë të Manastirit t Deçanit më në fund është zgjidhur.
Më 13 mars të këtij viti, kryeministri i Kosovës, Albin Kurti, njoftoi se i kishte kërkuar Agjencisë Kadastrale që të bëjë kalimin e 24 hektarëve tokë në emër të Manastirit të Deçanit. Shefi i qeverisë Kurti tha se zbatimi i vendimit të Kushtetueses do të ishte vendimtar për aplikimin e Kosovës për anëtarësim në Këshillin e Europës, gjatë punimeve të Asamblesë Parlamentare të këtij institucioni, që do të mbahet në prill, pra muajin e ardhshëm.
Vendimi i qeverisë së Kosovës ishte kritikuar nga zyrtarët lokalë në Deçan dhe një shoqatë e historianëve në këtë komunë, që e kanë cilësuar vendimin e Gjykatës Kushtetuese si të padrejtë. Toka që u regjistrua në pronësi të Manastirit gjendet rreth këtij manastiri dhe në Kadastër kishte qenë e shënuar si pronë e dy ndërmarrjeve “Iliria” e “Apiko”, e para hotel dhe e dyta, fabrikë mjalti.
Pronësia e Manastirit të Deçanit mbi këta 24 hektarë tokë u konfirmua nga Gjykata Kushtetuese e Kosovës, në muajin maj të vitit 2016. Por, këtë vendim, autoritetet lokale të Deçanit nuk e kishin zbatuar, duke argumentuar se kjo sipërfaqe ishte marrë me dhunë në vitet ’90 nga regjimi i udhëheqësit të atëhershëm serb, Sllobodan Millosheviç, i njohur si “Kasapi i Ballkanit”.
Nga Manastiri i Deçanit, patën thënë më herët për Radion Evropa e Lirë se në vitin 1997, manastirit iu kthyen 24 nga gjithsej 700 hektarët tokë, që iu morën në vitin 1946 nga pushteti komunist i Jugosllavisë së atëhershme.
Bashkësia ndërkombëtare vazhdimisht i kishte kërkuar Kosovës që të zbatonte vendimin e Gjykatës Kushtetuese të Kosovës lidhur me 24 hektarët tokë të Manastirit të Deçanit.
