Tenisti serb, Novak Xhokoviç u shpreh i lumtur dhe mirënjohës lidhur me vendimin e një gjyqtari në Melburn të Australisë, që hodhi poshtë vendimin e qeverisë australiane për t’i anuluar vizën.
Ai tha se dëshiron që të garojë në Australian Open, një prej turneve kryesore në sportin e tenisit.
Jam i lumtur dhe mirënjohës që gjykatësi hodhi poshtë anulimin e vizës. Pavarësisht asaj që ndodhi, unë dua të qëndroj e të tentoj të garoj në Australian Open dhe jam i fokusuar për këtë. Erdha këtu për të luajtur një prej turneve më të rëndësishëm, para tifozëve të jashtëzakonshëm.
I’m pleased and grateful that the Judge overturned my visa cancellation. Despite all that has happened,I want to stay and try to compete @AustralianOpen
I remain focused on that. I flew here to play at one of the most important events we have in front of the amazing fans. 👇 pic.twitter.com/iJVbMfQ037— Novak Djokovic (@DjokerNole) January 10, 2022
Më herët gjatë ditës, 34-vjeçari u lirua nga qendra e ndalimit në Australi, pasi gjykatësi Anthony Kelly e konsideroi “të paarsyeshëm” vendimin e Qeverisë për t’i refuzuar hyrjen në këtë shtet.
Pas vendimit, familja e Xhokoviçit u shpreh se “e vërteta dhe drejtësia fituan”. Në një konferencë shtypi në Beograd, vëllai i tij Gjorgje deklaroi:
Ishte sfidë e madhe për të gjithë ne si familje. Kemi bërë gjithçka që të respektojmë të gjitha protokollet. U treguam shumë të ndjeshëm e është shumë e vështirë për ne, që ta mbrojmë Novakun pa ofenduar askënd. E vërteta dhe drejtësia dolën në pah e dua të falënderoj sistemin ligjor të Australisë, gjykatësin Kelly, i cili ishte i paanshëm dhe shqyrtoi të gjitha faktet, nga momenti kur Novak arriti në aeroportin e Melburnit.
Tashmë, tenisti lejohet të luajë në Australian Open, më 17 janar, pikërisht se gjykatësi në Melburn rrëzoi vendimin e qeverisë australiane që i anuloi vizën, si dhe urdhëroi daljen e tij nga karantina. Javën e kaluar, Xhokoviçit iu mohua hyrja në Australi, me justifikimin se nuk është i vaksinuar kundër koronavirusit. Por, një përfaqësues i qeverisë bëri të ditur se pavarësisht vendimit, Ministria e Emigracionit rezervon të drejtën për ta dëbuar. Nëse kjo ndodh, tenisti serb nuk mund të shkelë për tre vjet në territorin australian.