Osteoartriti, sëmundja që prek të gjitha artikulacionet dhe mund të çojë deri në invaliditet, ka prekur 528 milion njerëz në mbarë botën.
Një raport i fundit i Organizatës Botërore të Shëndetësisë, bën me dije, se në 30 vite kjo sëmundje e nyjeve, është rritur me 113%.
Osteoartriti është një gjendje degjenerative e kyçeve e cila shkakton dhimbje, ënjtje dhe ngurtësi, duke ndikuar në aftësinë e një personi për të lëvizur lirshëm.
Ajo konsiderohet një sëmundje e paevitueshme me rritjen e moshës. Sipas të dhënave globale, rreth 73% e njerëzve që jetojnë me osteoartrit janë mbi 55 vjeç.
Sëmundja është më e shprehur tek femrat të cilat përbëjnë 60% të totalit.
Veç plakjes, ekspertët vlerësojnë se osteoartriti haset dhe tek moshat e reja.
Disa faktorë që rrisin riskun për osteoartritit janë lëndimet, si fraktura, tendosje, stres i përsëritur në sport ose në punë, sëmundjet para-ekzistuese të kyçeve, sëmundje specifike metabolike, si diabeti apo obeziteti.
Parashikimet janë se me plakjen e popullsisë dhe rritjen e shkallës së obezitetit dhe lëndimeve, prevalenca e osteoartritit pritet të vazhdojë të rritet globalisht.