Ministria e Jashtme e Rusisë ka deklaruar se do të hapë hyrjen në portet e Detit të Zi të Ukrainës vetëm nëse hiqen sanksionet kundër Kremlinit, raporton agjencia e lajmeve Interfax.
Ukraina, një nga prodhuesit më të mëdhenj të grurit në botë, eksportonte shumicën e mallrave të saj përmes porteve të saj detare, por që kur Rusia dërgoi trupa në Ukrainë, ajo është detyruar të eksportojë me tren ose nëpërmjet porteve të saj të vogla të lumit Danub.
Shefi i OKB-së për ushqimin, David Beasley i bëri thirrje të mërkurën presidentit rus Vladimir Putin, duke i thënë: “Nëse keni zemër, ju lutemi hapni këto porte“.
Është e vështirë të besohet se Ukraina ka nevojë për ndihmë me një krizë ushqimore në rritje, duke pasur parasysh rolin e vendit në ushqimin e botës përpara luftës, thonë Kombet e Bashkuara.
Manal Fouani, një përfaqësuese në Ukrainë nga Programi i Kombeve të Bashkuara për Zhvillim (UNDP), i thotë BBC-së se 90% e ukrainasve do të bien në varfëri deri në fund të vitit nëse konflikti vazhdon.
Ukraina ka një popullsi prej afro 45 milionë banorësh, me 15 milionë njerëz aktualisht refugjatë ose të zhvendosur brenda vendit.
“Tingëllon e vështirë të besosh se ne duhet të ushqejmë ukrainasit, ndërsa ukrainasit ushqejnë botën”, tha ajo.
Ajo shton se kapanonet e grurit në Ukrainë janë plot, sepse është shumë e vështirë për t’u eksportuar, kështu që nëse fermerët kultivojnë dhe korrin më shumë kultura, nuk ka hapësirë për t’i ruajtur ato.
