Autoritetet në Brazil njoftuan së fundmi vdekjen e anëtarit të fundit të një grupi indigjenësh, i cili kishte jetuar përgjatë gjithë kohës i izoluar nga pjesa tjetër e njerëzimit. Mosha e tij, gjithashtu, vetëm mund të hamendësohej. Ai dukej se ishte rreth 60 vjeç, thanë zyrtarët. Ai njihej si “Man on the Hole”, sepse hapte vrima të thella në tokë si gracka për të kapur kafshë, ndërsa disa të tjera i përdorte për tu fshehur.
Trupi i tij u gjet pranë vendit ku strehohej dhe mbi të nuk kishte shenja dhune. Burri ishte i fundit i një grupi indigjen, 6 anëtarët e tjerë të mbetur të të cilit u vranë në vitin 1995. Grupi jetonte në zonën indigjene Tanaru në shtetin Rondonia, i cili kufizohet me Bolivinë. Shumica e fisit të tij mendohej se ishte vrarë në vitet 1970 nga fermerët që donin të zgjeronin tokën e tyre.
Ishte një moment historik i trishtuar për një vend që vitet e fundit ka parë dobësimin dhe minimin e mbrojtjeve për grupet indigjene nga një administratë që i ka dhënë përparësi zhvillimit të Amazonës në vend të ruajtjes. Një zyrtar i Funai, i cili nuk ishte i autorizuar të fliste në procesverbal, tha se agjencia do të kryente gjithashtu teste të ADN-së dhe më pas do ta kthente trupin në pyll për t’u varrosur.
Trupi i burrit ishte i mbuluar me pupla, sipas Marcelo dos Santos, një ekspert indigjen. Funai ka raportuar prova të të paktën 114 grupeve të izoluara në Brazil, por ekzistenca e vetëm 28 është konfirmuar. Si rezultat, 86 fiset e mbetura nuk përfitojnë nga asnjë mbrojtje nga qeveria. Agjencia është përgjegjëse për monitorimin e aktivitetit indigjen dhe mbrojtjen e tokave të banuara nga zhvillimi. Megjithatë, presidenti i Brazilit, Jair Bolsonaro, ka mbrojtur industritë që nxisin shkatërrimin e Amazonës, gjë që ka çuar në nivele rekord të shpyllëzimit.
