Dëgjo live TOP ALBANIA RADIO
Dëgjo live TOP GOLD RADIO
Dëgjo live MY MUSIC RADIO
Voto në THE TOP LIST
Bota

Zhvillim historik, OBSH mbështet vaksinën kundër malaries për fëmijët afrikanë!

Organizata Botërore e Shëndetësisë vendosi që vaksina e miratuar kundër malaries, të shpërndahet te fëmijët afrikanë, gjë që mund të shënojë përparim të madh kundër sëmundjes që çdo vit vret qindra mijëra persona. OBSH rekomandoi vaksinën Mosquirix, e krijuar nga kompania britanike e ilaçeve, GlaxoSmithKline që e mirëpriti rekomandimin e OBSH-së.

Prej vitit 2019, 2.3 milion doza të kësaj vaksine u janë dhënë foshnjave në Gana, Kenia e Malavi, përmes një programi të zgjeruar, të koordinuar nga OBSH-ja. Shumica e personave që vret malaria janë nën 5-vjeç.

Kreu i OBSH-së, Tedros Adhanom Ghebreyesus:

Programi është rezultat i një dekade testimesh klinike në 7 shtete afrikane. Kjo vaksinë u krijua në Afrikë nga shkencëtarët afrikanë dhe ne jemi shumë krenarë. Përdorimi i saj mund të shpëtojë mijëra jetë njerëzish, çdo vit!

Në Afrikë, malaria është shumë më vdekjeprurëse se COVID-19, ndërsa 94% e rasteve dhe vdekjeve prej saj raportohen në Afrikë, kontinent me 1.3 miliard banorë. Sëmundja shkaktohet nga pickimi i mushkonjave të infektuara. Simptomat përfshijnë temperaturë, të vjella e këputje trupore. Një tjetër vaksinë kundër malaries e quajtur R21/Matrix-M, e zhvilluar nga shkencëtarët e Universitetit të Oksfordit në Britani ka shfaqur 77% efikasitet në një studim të kryer për një vit me 450 fëmijë në Burkina Faso. Studimi vijon ende.

Ekspertët thonë se tani, sfidë do të jetë mobilizimi i financimit për prodhimin e shpërndarjen e vaksinës në disa prej vendeve më të varfra në botë. GSK-ja u zotua për prodhimin e 15 milion dozave të Mosquirix-it çdo ditë, deri më 2028-ën. Një studim parashikon se kërkesa për vaksinë kundër malaries do të shkojë nga 50 deri në 100 milion doza në vit deri më 2030-ën, nëse shpërndahet në zonat me shkallë të lartë të përhapjes së sëmundjes.