Tragjedi në një autostradë në Bullgarinë perëndimore, ku një autobus me targa të Maqedonisë së Veriut mori flakë pas përplasjes e humbën jetën të paktën 46 persona, shumica shqiptarë të Maqedonisë së Veriut. Mes atyre që humbën jetën ishin 12 fëmijë.
Ngjarja tragjike ndodhi rreth orës 03:00 të mëngjesit të sotëm, në autostradën “Struma” Sofje-Bllagoevgrad rreth 40 kilometra në jug kryeqytetit Sofje. 7 vetë shpëtuan dhe u dërguan në spital, për t’u trajtuar nga djegiet e marra. Burime spitalore thonë se gjendja e tyre shëndetësore paraqitet e qëndrueshme. Policia bullgare nisi hetimet.
Një zyrtar i Ministrisë së Brendshme të Bullgarisë, Nikolai Nikolov i tha televizionit privat BTV:
Të paktën 45 persona kanë vdekur pasi një autobus u përplas dhe më pas është përfshirë nga flakët.
Por, pak minuta pas kësaj deklarate, autoritetet e përditësuan bilancin e viktimave, duke konfirmuar shifrën 46. Besohet se në autobusin që kthehej nga Stambolli i Turqisë për në Shkup, gjendeshin 53 persona. Automjeti ishte në pronësi të një agjencie turistike.
Shkaku i përplasjes po hetohet. Në raportimet paraprake të mediave bullgare, u bë e ditur se autobusi mund të ketë goditur një parmak. Ministri i Brendshëm i Bullgarisë, Boyko Rashkov, shkoi në vendin e ngjarjes.
Nuk është për t’u parë. Kurrë nuk kam parë diçka të tillë!
Kryeministri i Maqedonisë së Veriut, Zoran Zaev shprehu ngushëllime ndërsa udhëtoi drejt Bullgarisë, i shoqëruar nga zv.kryeministri Bujar Osmani e ministri i Shëndetësisë, Venko Filipçe. Zaev tha se për lajmin tragjik u njoftua nga presidenti bullgar Rumen Radev e kryeministri Stefan Janev.
Bullgaria është përballur me disa aksidente rrugore vdekjeprurëse. Më i fundit, në vitin 2018, kur 17 turistë bullgarë humbën jetën pas rrëshqitjes dhe rrokullisjes së një autobusi, si pasojë e lagështisë. Aksidentet zakonisht janë shkaktuar për shkak të kushteve në rrugë, makinave të vjetra dhe shpejtësisë. Sipas të dhënave zyrtare, 628 persona kanë humbur jetën në aksidente rrugore më 2019-ën dhe 463 vitin e kaluar, në Bullgarinë me 6.9 milion banorë.
