Liderëve të Ballkanit Perëndimor të mbledhur në Shkup, James O’Brien iu tha se asnjëherë nuk kanë qenë më afër anëtarësimit europian, por ende kanë punë përpara. Këto deklarata, ndihmëssekretari amerikan i Shtetit për Europën dhe Euroazinë, i bëri në nisje të konferencës “Plani i Rritjes së Ballkanit Perëndimor dhe Integrimi më i Shpejtë në BE”, që po mbahet në kryeqytetin e Maqedonisë së Veriut.
Zyrtari amerikan i paralajmëroi udhëheqësit e rajonit se nuk do të kenë mundësi të pengojnë rrugëtimin e njëri-tjetrit, pasi nuk duhet të ekzistojnë çështje të pazgjidhura e se kushdo që përpiqet të pengojë diçka do të përballet me ndëshkime.
Nëse një shtet dëshiron të presë, të vëzhgojë, atëherë qytetarët e atij shteti do të vendosin nëse këta liderë politikë janë të duhurit.
O’Brien tha se mbështetet nismën e një tregu të lirë mes vendeve të rajonit, duke përmendur pengesat e deritanishme të bizneseve nga ndalesat e shumta kufitare. Sipas tij, plani i ri i BE-së dallon prej ofertave paraprake.
Plani i BE-së për rritje nuk është si planet tjera që kemi parë deri tani. Ai thotë se jo vetëm që duhet të bëni reforma e të merrni buxhet më vonë, por gjithashtu thekson që nëse bëni reformat e duhura, kompanitë dhe njerëzit tuaj do të fitojnë lirinë e BE-së shumë shpejt, lirinë për të lëvizur, për të punuar ku të doni.
Plani i BE-së për Ballkanin Perëndimor synon rritjen ekonomike të rajonit, përshpejtimin e reformave të duhura, si dhe kryerjen e investimeve që mund të çojnë përpara procesin e zgjerimit të BE-së me këto vende.
Për periudhën 2024-2027, BE-ja ndau 6 miliardë euro për këtë plan.
Ndërkaq, drejtori i Komisionit Europian për Fqinjësinë, Gert Jan Kopman, kërkoi angazhim të madh të liderëve të Ballkanit për rrugën përpara.
Ne i kemi përveshur mëngët që t’ju ndihmojmë. Jam i inkurajuar nga përkushtimi juaj dhe kjo mund të ndodhë vetëm nëse qeveritë e rajonit vlerësojnë se ky është një prioritet i lartë e gjithashtu vetëm nëse sigurohen se ndryshimet po ndodhin. Pikërisht, logjika thotë se ne do t’ju ndihmojmë që të integroheni, nëse ju integroheni në tregun e brendshëm.
Kjo është e një rëndësie absolute, sepse pa një integrim të tillë në rajon, ju thjesht nuk do të mund të shfrytëzoni mjaftueshëm përfitimet nga tregu i brendshëm. Këto janë dy çështje që shkojnë bashkë ndaj kemi vendosur një kusht në këtë plan të rritjes e që thotë se ju nuk duhet të bllokoni fqinjët. Duam të vini me ne. Nëse nuk i bllokoni fqinjët do t’ju pranojmë, por nëse i bllokoni, atëherë nuk do të kemi qasje në tregun e brendshëm, pasi kostot nga mosbashkëpunimi janë shumë të mëdha.