Kreu i Partisë së Lirisë, Ilir Meta ka kryer një kallëzim në Prokurorinë e Tiranës, në të cilin denoncon se persona të paidentifikuar i kanë vjedhur një hard disc me materiale në zyrën e PL.
Në kallëzimin e Metës, thuhet se më datë 6 mars disa persona janë futur natën në zyrën e partisë që ai drejton dhe kanë vjedhur hard disc-un, i cili ruan pamjet e kamerave të sigurisë në zyrën e Partisë së Lirisë. Sipas kallëzimit, këta persona kanë qenë në dijeni të vendndodhjes së çelësave të dhomës ku ndodhej DVR, të cilën pasi e kanë marrë e kanë zëvendësuar me një tjetër.
“Në pajisjen DVR (hard disk) të Partisë së Lirisë më datën 06.03.2024 në orën 23:40:06 dhe me shënimin elektronik change working HDD to <1> vërtetohet se persona të paautorizuar kanë hyrë në orën e vonë, saktësisht, në godinën e Partisë së Lirisë, duke qenë në dijeni të vendit të çelësave, i kanë marrë ato dhe janë ngjitur në ambientin ku ndodhej pajisja DVR (hard disk), të cilin sipas edhe skedës elektronike bashkëlidhur këtij kallëzimi rezulton se është ndërruar”, thuhet në kallëzim.
Partia e Lirisë thotë se kanë evidentuar vjedhjen e serverit, pasi DVR që ishte zëvëndësuar nuk kishte të njëtin kapacitet dhe janë fikur kamerat natën. Sipas kallëzimit të Metës, janë vjedhur komunikimet elektronike të Partisë së Lirisë.
Është marrë pajisja DVR (hard disk) ekzistues dhe është vendosur një pajisje tjetër DVR (hard disk). Fakti që DVR (hard disk) është ndërruar dhe që pajisja DVR (hard disk) e vendosur ka një kapacitet më të kufizuar, ka mundësuar fikjen e kamerave natën. Ky fakt provohet jo vetëm nga informacioni elektronik i skedës, por edhe nga kapacitetet e ndryshme të pajisjeve DVR (hard disk).
Në këto kushte, nga ana e personave të paidentifikuar është konsumuar vjedhja e rrjetit të komunikimeve elektronike të Partisë së Lirisë, parashikuar nga nenet 137/a/2. Duam të sqarojmë organin procedues se këta persona jo vetëm që kanë qenë të paautorizuar por kanë hyrë në mesnatë në selinë e Partisë së Lirisë në rrethana që nuk njihen nga ana jonë.
Përveç sa përshkruam më lart nga ana jonë dhe stafi përkatës janë konstatuar lidhje, këputje dhe dëmtime të linjave kabllore, po nga persona të paidentifikuar, në kohë dhe si person, në tarracën e godinës së Partisë së Lirisë, të hyrë në seli në mënyrë të fshehtë.
Marrja e pajisjes DVR (hard disk) (ndërrimi i tij) përbën vjedhje jo vetëm në kuptimin e pajisjes DVR (hard disk) si pajisje elektronike, por në vështrim të nenit 137/a/2 dēmi parësor dhe qëllimi i vjedhjes së pajisjes DVR (hard disk) ka qenë vjedhja e rrjetit të komunikimeve elektronike me të Kjo vjedhje nga ana objektive rezulton se nuk mund të kryhet nga një person i vetëm. Fakt të cilin ju do ta konstatoni nga hetimi dhe kqyrja e vendit të ngjarjes dhe në lidhje me këtë mekanizëm kriminal, kualifikimi ligjor i veprës është sipas paragrafit të dytë të nenit 137/a, pra në bashkëpunim.
Po kështu është konstatuar vjedhja e impulseve telefonike dhe ndërhyrja në këtë rrjet nga persona të paidentifikuar, gjoja për të riparuar këtë sistem. Ky konkluzion i yni derivon nga fakti që në muajt e fundit sistemi i brendshëm telefonik, me të cilin funksionon së bashku edhe rrjeti elektronik, ka patur defekte të njëpasnjëshme. Edhe këto veprime janë kryer jo nga një person i vetëm dhe në kohë të ndryshme”, thuhet në kallëzim.
