Së fundmi, Ford ka tërhequr mbi 634,000 SUV në mbarë botën sepse një injektor “i plasaritur” karburanti mund të derdhë karburant ose të rrjedhë avuj në një motor të nxehtë dhe të shkaktojë zjarre. Sipas mediave të huaja, tërheqja mbulon SUV-të Bronco Sport dhe Escape nga viti 2020 deri në 2023. Të gjithë kanë motorë 1.5 litra me tre cilindra.
Prodhuesi i automjeteve në Michigan, tha se nuk u kërkon pronarëve që të ndalojnë drejtimin e automjeteve ose t’i parkojnë ato jashtë, sepse zjarret janë të rralla dhe në përgjithësi nuk ndodhin kur motorët janë të fikur. Por gjithashtu Ford tha se ka marrë 20 raportime për zjarre, duke përfshirë tre që kanë ndezur strukturat aty pranë. Kompania tha gjithashtu se ka katër pretendime për zjarre që u vunë re më pak se pesë minuta pasi motorët u fikën.
Ford gjithashtu ka katër pretendime për lëndime që nuk përfshijnë djegie dhe 43 pretendime ligjore që i atribuohen problemit. Riparimet nuk janë ende të disponueshme, por pasi të jenë, pronarët duhet të planifikojnë shërbimin me një tregtar të preferuar, tha në një deklaratë Jim Azzouz, nga Ford.
Pronarët do të njoftohen me letër duke filluar nga 19 dhjetori. Rikujtojmë, se Ford njoftoi së fundmi se ka finalizuar një dalje të plotë nga Rusia me shitjen e aksioneve të saj në një sipërmarrje të përbashkët me bazë në rajonin e Moskës. Sipas mediave të huaja, Ford ishte në mesin e një numri të prodhuesve të huaj të automjeteve që pezulluan operacionet në Rusi në mars.
