Para mbledhjes së dy qeverive, kryeministri Edi Rama deklaroi vendimin për të hequr tarifat doganore me Kosovën. Nga dje, Rama ndodhet në Kosovë, ku sot zhvillohet mbledhja 8-të e përbashkët, në Prishtinë. Kreu i ekzekutivit theksoi se “nuk ka kuptim që tarifat doganore të hiqen me vendet e tjera të “Ballkanit të Hapur” e të mos hiqen me Kosovën”. Fillimisht u ndal në fshatin Xërxë, një sipërmarrje të njohur në rajon për prodhimin e miellit të grurit, me cilësi të lartë.
Që të mos mbetemi vetëm në atë pjesën e takimeve zyrtare e politike, menduam të bëjmë takim edhe me ata që janë motori që lëviz jetën ekonomike. Kisha dëgjuar shumë për këtë sipërmarrje prandaj e kam për nder që m’u dha mundësia ta vizitoj, edhe ndërkohë bashkë me ministren po flisnim për rritjen e bashkëpunimit e për shkrirjen komplet të të gjithë pengesave të kufirit. Kur vjen puna te produktet bujqësore, kjo është “A”.
Gjithashtu ne kemi bërë një plan e do ta vëmë në lëvizje që të heqim tarifat doganore me Kosovën. Dëshirën e kemi që të bëhet bilaterale edhe me qeverinë e Kosovës, po ne do ta bëjmë. Ata kanë kërkuar më shumë kohë për të analizuar, por ne do ta bëjmë, se nuk ka kuptim që ne t’i heqim me “Ballkanin e Hapur” dhe mos i heqim me Kosovën. Kështu që do t’i heqim tarifat për gjithë çfarë vjen nga Kosova, përjashto atë të skanimit, se asaj s’kemi çfarë i bëjmë. Ajo është e trashëguar e s’lëviz, por gjithë pjesën tjetër nuk do ketë më tarifa për të gjithë ata që do eksportojnë nga Kosova në Shqipëri.
Kryeministri shtoi se “anasjelltas do ta bëjë qeveria e Kosovës dhe ne duam ta bëjmë bilaterale”.
Por nëse qeveria e Kosovës do më shumë kohë për ta studiuar, ne do ta bëjmë gjithsesi sepse nuk duam që ta kemi të hapur pa tarifa me të tjerët në Ballkanin e Hapur dhe të mos e kemi me Kosovën!
