Supermodelja braziliane Gisele Bundchen ka folur së fundmi për një nga momentet më traumatizuese të karrierës së saj, duke kujtuar se si ajo u përlot në një sfilatë të modës së Alexander McQueen në vitin 1998, kur pa veshjen tepër të ekspozuar me të cilën i duhej të modelonte në pasarelë.
41-vjeçarja, tanimë nënë e dy fëmijëve ishte vetëm 18 vjeçe kur bëri debutimin e saj në Javën e Modës në Londër në fund të viteve ’90, një përvojë që ajo tani e pranon se është një nga kujtimet më të errëta nga karriera e saj prej dekadash.
Duke folur për ‘British Vogue’, Gisele e cila është e martuar me Tom Brady u shpreh se:
Ky ishte një nga momentet më traumatizuese. Nuk kisha bërë prova, kështu që kur u paraqita në shfaqje dhe thashë: “Pra, çfarë do të vesh?”. Unë mund të thoja disa fjalë anglisht në atë kohë, por nuk i kuptoja gjysmën e gjërave, kështu që thjesht bëra sikur kuptoja. Nuk kisha asnjë ide. Dhe unë thashë: ‘A është një bluzë apo diçka tjetër?’ Jo, ishte kjo. Kështu fillova të qaja”. Grimieri tha: “Të lutem mos qaj!” Isha duke ecur gjatë gjithë kohës duke menduar: “Shpresoj që babai im të mos më shohë”.
Megjithatë, modelja këmbënguli se e ka shndërruar përvojën ‘traumatizuese’ në një mësim të mirë, duke shtuar:
Gjithçka që doja të bëja ishte të largohesha, por, e dini, është një nga ato gjëra që të bëjnë më të fortë.
Rikujtojmë se Bündchen së fundmi përmes një video të cilën e shpërndau në rrjetin e saj social Instagram ka treguar se si shpëtoi një breshkë e cila ndodhej në një rrjetë peshkimi. Ajo shfaqej e ulur pranë krijesës, duke hequr me kujdes rrjetën në të cilën kishte përfunduar breshka. Pasi e shpëtoi atë nga rrjeta, ajo e dërgon në habitatin e saj. Ajo tregon si e gjeti breshkën teksa shëtiste me qenin dhe çfarë bëri për ta ndihmuar.