Qendra Amerikane për Kontrollin e Parandalimin e Sëmundjeve dhe Administrata e Ushqimeve dhe Ilaçeve po rekomandojnë që Shtetet e Bashkuara të pezullojnë përdorimin e vaksinës anti-COVID të “Johnson& Johnson”. Vendimi pason raportimet për 6 raste të rralla e të rënda të mpiksjes së gjakut.
Këto 6 janë mes më shumë se 6.8 milionë dozave të administruara deri tani në Amerikë. Ato iu përkasin femrave të grupmoshës nga 18 në 48-vjeçe. Simptomat u zhvilluan në periudhën nga 6 në 13 ditë pas vaksinimit të vaksinën monodozë.
Qendra për Kontrollin e Parandalimin e Sëmundjeve do të thërrasë nesër një takim të Komitetit Këshillues mbi Praktikat e Imunizimit. Kjo për të bërë një vlerësim të hollësishëm të rasteve të deklaruara. Hetimi nuk do të mungojë as nga ana e FDA-së. Deri në një analizë të plotë rekomandohet pezullimi i vaksinimit, si masë paraprake kujdesi.
Për autoritetet shëndetësore amerikane, kjo është e rëndësishme që komuniteti i profesionistëve të shëndetit të marrë informacion mbi efektet e mundshme anësore. Vaksina e “Johnson&Johnson”-it merret vetëm përmes një doze dhe është 66% efektive. Studimi për të përfshiu 44 mijë vullnetarë dhe u krye në tre kontinente e në disa lloje të koronavirusit.
Gjithashtu, kompania tha se rezultatet e saj paraprake tregojnë se një dozë e vetme parandalon 85% të rasteve të rënda.
Kjo është vaksina e katërt e miratuar nga Agjencia Europiane e Medikamenteve pas “Pfizer&BioNTech”-ut, “Moderna”-s e “AstraZeneca”-s.
Administrata Amerikane e Ushqimit dhe Ilaçeve e ka miratuar në fund të muajit shkurt ndërsa Organizata Botërore e Shëndetësisë, më 12 mars.
