Robotët janë akoma diçka e rrallë në restorantet gjermane, por si rezultat i mungesës së personelit kjo gjë në të ardhmen mund të ndryshojë. Ky robot i vogël është vetëm 1.30 metra i gjatë, por ai mund të mbajë shumë tabaka në të njëjtën kohë, të vrapojë nëpër restorant me një ritëm të shpejtë dhe të punojë pa pushim.
Në një restorant sushi në Köln, roboti i quajtur Miaomiao është pjesë e stafit të shërbimit dhe shkon nëpër tavolina në mënyrë autonome. Klientët mund ta marrin ushqimin nga tabakaja që roboti ofron, ai thotë “faleminderit” dhe niset për në tryezën tjetër.
Ka një mungesë të personelit në tregun e hotelierisë – një mundësi në rritje për robotët e shërbimit si një lloj kamerieri ndihmës, thonë disa. Përdorimi i robotëve të tillë nuk është ende i përhapur në Gjermani, thotë profesori i ekonomisë Valentin Weislämle nga Universiteti Shtetëror i Kooperues Baden-Württemberg. Megjithatë, është e qartë se numri i pajisjeve është në rritje dhe se robotët e shërbimit nuk do të zhduken. Në këtë aspekt mund të flitet për një trend.
Mungesa e stafit në industri është një përshpejtues i përhapjes së tyre, shpjegon kreu i kursit të administrimit të biznesit për turizëm, hoteleri dhe gastronomi. Faktori vendimtar është gjithmonë kostoja. Robotët e shërbimit për përdorim komercial kushtojnë të paktën rreth 10,000 euro dhe, në varësi të opsioneve dixhitale, shumë më tepër.
Kështu që ato mund të përdoren pa pushim. Ky zhvillim do të jetë patjetër i pandalshëm, beson Weislämle. Makineritë mund të veprojnë si pajisje transporti për enët, të marrin porosi me njohjen e të folurit dhe të dorëzojnë ushqimin në vendin e saktë. Roboti gjithashtu mund të zëvendësojë një punonjës shërbimi, thotë shkencëtari. Shoqata e hoteleve dhe restoranteve Dehoga, njoftoi se aktualisht ekzistojnë vetëm disa institucione hotelierike në Gjermani që punojnë me pajisje të tilla, për shembull në rajonin Allgau në Bayreuth dhe në Berlin.
Punëdhënësit në vende të ndryshme të botës po kërkojnë mënyra të ndryshme për të mbuluar mungesat e fuqisë punëtore dhe shumë prej tyre gjithnjë e më shumë po shkojnë në drejtim të asistencës së teknologjisë së automatizuar dhe robotëve. Orientimi drejt teknologjisë së automatizuar nuk është ndonjë gjë e re dhe kjo lloj teknologjie është një fenomen shpëtues për shumë kompani të cilat nuk arrijnë objektivat me fuqinë punëtore, thuhet në një raport të ‘Wall Street Journal’.
