Shpëtohet mrekullisht një elefant afrikan pasi ishte fundosur krejtësisht nga balta thithëse në një rezervat natyror në Kenia. Doktori vendas Kieran Avery ishte pjesë e grupit të vogël që realizuan shpëtimin dramatik të elefantit femër, pasi u bllokua në baltën e ujërave pranë një dige.
Veterineri, gjithashtu aktivist i mbrojtjes së botës së egër, realizoi fotot e elefantit pasi u njoftua nga komuniteti për kafshen e bllokuar në zonën Isiolo.
Një grup punonjësish dhe vullnetarë vendas u bashkuan për shpëtimin e kafshës duke lidhur litarë rreth saj dhe më pas duke e tërhequr butësisht me një traktor, derisa e çliruan nga ‘burgu’ i baltës. Pas shpëtimit kafsha qëndroi disa minuta për t’u qetësuar dhe më pas nisi të nxitonte drejt tufës së saj, që e kishin lënë prapa.
Doktori tha: Një telefonatë erdhi nga komuniteti që na njoftoi për elefantin e bllokuar. Ne kemi pasur eksperienca të mëparshme të ngjashme me elefantët dhe u mobilizuam menjëherë për të ndihmuar.
Ajo kishte ngecur vetë në baltën e trashë ndërsa tufa e saj kishte avancuar larg digës. Elefanti ishte i stresuar dhe i ezauruar nga lodhja, por ajo kishte ende ndjenjën e rezistencës për të shpëtuar dhe kjo ishte kryesorja.
Për të çliruar një elefant duhet të kesh mjetet e duhura dhe kjo përfshin traktorin, litarë të fortë dhe njohuri të sjelljes së elefantit.
Grupit iu deshën rreth një orë e gjysmë për të realizuar çlirimin e elefantit.
Më tej ai shtoi: Mënyra më e mirë për lidhjet është që litarët të vendosen rreth pjesës së pasme, poshtë bishtit. Traktori më pas ushtron me kujdes tension për të pozicionuar litarët dhe largimin e elefantit nga balta drejt tokës së fortë. Nuk duhet një grup i madh njerëzish, por vetëm disa me mjetet e duhura.