Kompania Oji Holdings ka njoftuar se do të ndalojë prodhimin e pelenave për fëmijë në Japoni nga shtatori i ardhshëm për shkak të uljes së kërkesës pasi shitjet e tyre ranë nga rreth 700 milionë në 2001 në 400 milionë. Ndërkohë, pelenat për të moshuarit janë shumë të kërkuara në Japoni dhe kanë më shumë se një dekadë shitur më shumë se pelenat për fëmijë.
Numri i lindjeve në Japoni ra vitin e kaluar në një rekord të ulët prej 758,631 kundrejt 1,590,503 vdekjeve. Në vitin 2022, përqindja e fëmijëve nën moshën 15 vjeç korrespondonte me më pak se 12% të popullsisë së vendit, ndërsa ajo e atyre mbi 65 vjeç arriti në 30%. Popullsia e Japonisë nga 125 milionë sot pritet të bjerë në 88 milionë deri në vitin 2065, një rënie prej 30% gjatë 45 viteve.
Kryeministri i Japonisë, Fumio Kishida, i ka quajtur nivelet e ulëta të lindjeve një krizë ekzistenciale dhe urdhëroi mbështetje financiare për familjet e reja, më shumë leje prindërore dhe akses më të lehtë në kujdesin e fëmijëve. Fushatat e qeverisë kombëtare dhe autoriteteve lokale për të bindur japonezët që të kenë më shumë fëmijë deri më tani kanë pasur pak ndikim.
Rikujtojmë, se martesat në Kinë ranë në nivelin më të ulët që nga fillimi i regjistrimeve në vitin 2022, duke vazhduar një rënie të vazhdueshme gjatë dekadës së fundit edhe pse totali i martesave mund të jetë prekur nga bllokimet e rrepta të COVID-19. Vetëm 6.83 milionë çifte përfunduan regjistrimin e martesës vitin e kaluar, treguan të dhënat e publikuara në faqen e Ministrisë së Çështjeve Civile, rreth 800,000 më pak se një vit më parë.
Rënia e numrit të martesave vjen pasi vendi po përballet me një rënie të numrit të lindjeve dhe popullsisë. Në vitin 2022, popullsia e Kinës ra për herë të parë në gjashtë dekada, një rënie që pritet të shënojë fillimin e një periudhe të gjatë rënieje të numrit të qytetarëve të saj me implikime të thella për ekonominë e saj dhe botën. Ndërkaq, në Shqipëri lindshmëria po shënon nivele gjithnjë e më të ulëta. Njohës të fushës së demografisë, mjekë dhe zyrtarë shohin me shqetësim edhe rënien e numrit të lindjeve për një grua në moshë riprodhuese.
