Arabia Saudite po përgatitet të hapë dyqanin e saj të parë të pijeve alkoolike në kryeqytetin Riad që do t’u shërbejë ekskluzivisht diplomatëve jomuslimanë. Blerësit do të duhet të regjistrohen nëpërmjet një aplikacioni celular, të marrin një kod miratimi nga ministria e jashtme dhe të respektojnë kuotat mujore kur blejnë.
Lëvizja shënon një moment historik në përpjekjet e mbretërisë, të udhëhequr nga Princi i Kurorës Saudite, Mohammed bin Salman, për të hapur vendin ultra-konservator mysliman ndaj turizmit dhe biznesit, pasi pirja e alkoolit është e ndaluar në Islam. Dyqani i ri ndodhet në Lagjen Diplomatik të Riadit, një lagje ku banojnë ambasadorët dhe diplomatët, dhe do të jetë rreptësisht e kufizuar.
Ishte e paqartë nëse emigrantët e tjerë jomuslimanë do të kishin akses në dyqan. Një burim tha se dyqani pritet të hapet në javët e ardhshme. Arabia Saudite ka ligje të rrepta kundër pirjes së alkoolit të dënueshme me qindra kamxhik, dëbim, gjobë ose burgim dhe emigrantët gjithashtu përballen me dëbim. Si pjesë e reformave, fshikullimi u zëvendësua kryesisht me dënime me burg. Alkooli disponohej vetëm përmes postës diplomatike ose në tregun e zi.
Ndërkaq, rikujtojmë se më shumë se një e treta e adoleshentëve në Bashkimin Europian raportojnë se dehen herë pas here, që është dyfishi i numrit të të rriturve. Ky është një problem veçanërisht i madh në Danimarkë. Shkalla e konsumimit intensiv të alkoolit tek adoleshentët e moshës 15 dhe 16-vjeç është dukshëm më e lartë se tek të rriturit në shumicën e vendeve evropiane. Shkalla e konsumit të alkoolit ishte nën 25% vetëm në pesë vende, katër vende nordike dhe Portugali. Përveç Danimarkës, ishte gjithashtu mbi 45% në katër vende, përfshirë Gjermaninë, Austrinë, Sllovakinë dhe Kroacinë.
