Kur bëhet fjalë për telefonat, muzikën, filmat dhe shfaqjet, është e zakonshme që adoleshentët dhe të rinjtë ta ngrenë shumë lart volumin, sipas studimit të botuar të martën në revistën “BMJ Global Health”. Autorja kryesore e studimit Lauren Dillard përmes e-mailit tha:
Ne vlerësuam se 0,67 deri në 1,35 miliardë individë të moshës 12-34 vjeç në mbarë botën ka të ngjarë të përfshihen në praktika të pasigurta të dëgjimit dhe për këtë arsye janë në rrezik për humbjen e dëgjimit.
Dillard është një konsulent i “Organizatës Botërore të Shëndetësisë” dhe një bashkëpunëtore postdoktorale në “Medical University of South Carolina”.
Ekspozimi ndaj volumit shumë të lartë mund të lodhë qelizat shqisore dhe strukturat në vesh, tha Dillard.
Nëse kjo vazhdon për një kohë të gjatë, ato mund të dëmtohen përgjithmonë, duke rezultuar në humbje dëgjimi, tringëllimë në veshët ose të dyja bashkë.
Studiuesit kryen një meta-analizë të artikujve shkencorë në lidhje me praktikat e pasigurta të dëgjimit të publikuara midis viteve 2000 dhe 2021 në tre baza të të dhënave. Sipas studimit, praktikat e pasigurta u gjurmuan sipas përdorimit të kufjeve si dhe frekuentimit të vendeve të zhurmshme si koncerte, bare dhe klube. Disa qendra në SHBA për “Kontrollin dhe Parandalimin e Sëmundjeve” kufizojnë nivelet e sigurta të zhurmës në rreth 85 decibel mbi 40 orë në javë. Nëse jeni duke dëgjuar vetëm 2 orë e gjysmë gjatë një dite, kjo është e barabartë me rreth 92 decibel, tha studimi.
Megjithatë, ka mënyra për të parandaluar dëmtimin përpara se të vini re efektet. Disa pajisje i lejojnë njerëzit të monitorojnë nivelet e tyre të dëgjimit në cilësimet e pajisjes, tha ajo. Disa madje do t’ju paralajmërojnë kur keni dëgjuar shumë me zë të lartë për një kohë të gjatë. Dillard përmes e-mailit tha:
Nëse pajisja juaj thotë se po dëgjoni në nivele të larta, ulni volumin dhe dëgjoni muzikë për periudha më të shkurtra kohore.
Autorja e studimit Lauren Dillard u shpreh gjithashtu se:
Nëse jeni në një koncert ose vend me zë të lartë, mund ta mbroni dëgjimin tuaj duke qëndruar më larg nga altoparlantët dhe duke bërë pushime larg zhurmës, nëse është e mundur.
Nga ana tjetër neurologia Swanepoel në një e-mail tha:
Dëgjimi është ndjenja që na lidh me njerëzit që duam. Të kujdesemi për dëgjimin tonë është çelësi për ruajtjen e marrëdhënieve të shëndetshme dhe mirëqenies gjithashtu. Parandalimi parësor tek të rriturit është thelbësor për të shmangur fillimin e hershëm dhe humbjen e përshpejtuar të dëgjimit të lidhur me moshën.
