Vert është një nga artistët e rinj por mjaft të talentuar të tregut muzikor shqiptar. Ai është një ndër të paktët në Shqipëri që bën muzikë të rrymës “Trap”, gjë për të cilën foli më shumë i ftuar në studion e “Lancio”, por edhe mbi këngën e tij më të re “333”…
Pse mendon që producentët apo menaxherët nuk i japin shumë rëndësi kësaj rryme muzikore?
Nuk e di, të them të drejtën as unë nuk e kam studiuar shumë. Thjesht mua më vjen më kollaj që të bëj këtë rrymë. Kam eksperimentuar dhe me gjëra të tjera, që po e mendoj a t’i publikoj apo jo sepse nuk dua të dal shumë nga vetja ime. Më pëlqen të eksploroj, kam nja 2-3 projekte që janë ndryshe nga stili im, që mendoj t’i sjell pas ca kohësh. Është diçka që nuk e ka bërë asnjë në Shqipëri deri tani. Është një stil i lezetshëm, që para 30-40 vitesh ka pasur një ‘boom’ shumë të madh. Është një zhaner shumë i lezetshëm për të bërë muzikë dhe jam munduar ta përshtas me stilin tim.
Si e sheh tregun muzikor në lidhje me artistët e rinj?
Për ne artistët e rinj është pak e vështirë që të gjesh hapësira ku mund të këndosh këngët e tua, që të shpalosësh talentin tënd e të tregosh sa aftësi ke. Komerciali sot nuk të fal fare. Unë nuk është se nuk e dua komercialin, thjesht unë kam zgjedhur që të bëj këtë gjënë që për mua është shumë ‘nice’.
Cila ka qenë pagesa më e madhe që ke marrë deri tani?
Unë ngaqë kam qenë artist i ri kam punuar edhe pa lek. Kam marrë dhe shuma të vogla, rreth 5000 apo 7000 lek. Është shumë e vështirë sot si një artist i ri që të gjesh një skenë që të tregosh se çfarë di të bësh. Por kur do eksperiencën, do bësh dhe tolerime. Të jem i sinqertë nuk kam nxjerr akoma lek nga muzika. Po të më kishe pyetur disa kohë më parë do thoja ndonjë shifër të çuditshme, por sot jam i kënaqur edhe me pak, mjafton që njerëzit më duan. Nuk synoj të bëhem milioner nga muzika.
Pse ke vendosur ta titullosh këngën e fundit “333”?
Kënga titullohet “333” sepse është një simbolikë për orën 3:33 e mëngjesit. Kjo këngë flet për një ndjenjë timen, nuk përcjell një mesazh siç shumica e këngëve të tjera që kam bërë. Thjesht është një gjëndje imja. Kam pasur një ndarje nga një person i dashur i imi. Vendosa që ta publikoj sepse mund të ketë shumë njerëz si puna ime.
Nëse edhe juve ju pëlqen kjo këngë, ju mund të vazhdoni ta votoni atë për të qenë sa më gjatë pjesë e “The Top List”.
