Sekretari amerikan i Shtetit, Anthony Blinken i bëri thirrje Hamasit të pranojë “pa vonesë të mëtejshme” një propozim për një armëpushim në Gaza, i cili përfshin lirimin e pengjeve të mbajtura në Palestinë.
“Nuk ka më vonesa, jo më justifikime. Tani duhet të veprojmë”, u tha Blinken gazetarëve në Jordani pak para se të nisej për në Izrael në turneun e tij të shtatë në rajon që nga fillimi i luftës gati shtatë muaj më parë.
“Ne duam që kjo marrëveshje të zbatohet brenda ditëve në vijim”, theksoi ai.
Kur u pyet për qëllimin e kryeministrit izraelit Benjamin Netanyahu për të nisur një sulm tokësor në Rafah, qyteti në Rripin jugor të Gazës që është bërë një strehë për 1.5 milionë palestinezë të zhvendosur, Blinken tha se prioriteti i Uashingtonit ishte të arrinte një marrëveshje armëpushimi.
“Kjo është mënyra më e mirë, mënyra më efektive, për të lehtësuar vuajtjet dhe për të krijuar atë lloj mjedisi që do të na lejojë të shpresojmë të çojmë në diçka vërtet të qëndrueshme dhe të sjellim paqe të qëndrueshme për njerëzit që kanë nevojë dëshpërimisht për të.”
Në bisedimet në Izrael të mërkurën, Blinken tha se do të diskutonte me Netanyahu se çfarë hapash duhen marrë për të rritur ndihmën për Gazën. Edhe pse ka pasur disa përmirësime në situatën humanitare në enklavën me popullsi të dendur, ai theksoi se duhet bërë shumë më tepër për të siguruar që ndihma të arrijë tek njerëzit.
