“Nga muaji qershori e deri në atë shtator, turistët spanjollë do të mund të shijojnë një verë idilike mes brigjeve blu e Alpeve të mahnitshme shqiptare”. Kështu shkruan e përditshmja spanjolle “Gaceta del Turismo”, në një ftesë drejtuar shtetasve të Spanjës duke i sugjeruar të vizitojnë vendin tonë. Kjo lehtësohet edhe nga agjenci turistike që ofrojnë udhëtime ekskluzive në Shqipëri nga 15 qytete spanjolle me fluturime direkte duke përfshirë akomodimin.
Vera është dhe sezoni perfekt për të eksploruar Shqipërinë, një destinacion trendi që fsheh disa nga sekretet e ruajtura më mirë në Europë. Ofrohen fluturime direkte drejt Tiranës, kryeqytetit shqiptar, nga gjithsej 15 qytete spanjolle, si Madridi, Bilbao, Valencia, Zaragoza apo Sevilja, si edhe të tjera.
Udhëtimet që janë me fokus të theksuar rajonal, u ofrojnë turistëve nga e gjithë Spanja mundësinë për të nisur një aventurë unike dhe për të zbuluar një destinacion të pakrahasueshëm siç është Shqipëria.
Zbulimi i zemrës së Shqipërisë është i mundur duke filluar me Tiranën e gjallë, ku udhëtarët do të jenë në gjendje të eksplorojnë Muzeun Kombëtar të Historisë, të admirojnë arkitekturën e epokës komuniste dhe po ashtu të shijojnë jetën e gjallë të natës në kryeqytet.
Por, përtej kryeqytetit, udhëtarët do të mund të zbulojnë edhe Golemin, një fshat bregdetar në perëndim të vendit.
Gjithashtu, Shqipëria ofron plazhe të qeta me rërë pranë Adriatikut, perfekte për t’u çlodhur në një nga brigjet më të famshme të viteve të fundit, një kartolinë idilike që çdo udhëtar mund ta përjetojë.
Itinerari përfshin edhe Durrësin, një qytet plot histori e që mund të zbulohet duke ecur deri në amfiteatrin e tij romak e shëtitoren që ka.
Për ta përmbyllur, turi përfshin një udhëtim të fundit nga Radhima për në Vlorë. Plazhet e pastra kristal, si dhe gjiret e fshehura ofrojnë një mjedis ideal për të shijuar kuzhinën lokale buzë detit, ndërsa mund që të zbuloni anën më pak të njohur të Shqipërisë.
Udhëtarëve u ofrohet një mundësi unike për të vizituar një nga xhevahiret e fshehura në Europë. Turistët spanjollë mund të përjetojnë një verë plot me përvoja të reja në destinacionin e ri dhe tërheqës, Shqipërinë.
